Antón faise un lío co calendario con tantos días e tantos meses. Cómpre botarlle unha man xuntando os nomes coas cousas que fan. Así: se comeza o ano, hai neve e frío, é xaneiro; febreiro é o máis pequeno, o do entroido; marzo é o do tempo revolto; en abril as plantas énchense de flor; maio é un mes de xogos e festas; en xuño remata a escola e comeza o verán; xullo e agosto son para descansar e bañarse fuxindo da calor; en setembro volve a escola; outubro pon as follas de cores e maduran castañas e noces; en novembro faise o magosto; en decembro é o Nadal de alegría e agasallos, cando remata o ano.
Todo isto contado en cuartetas sinxelas e directas a ton coas ilustracións a toda páxina, nunha edición en capa dura dun formato distinto e resistente moi manexable polo lectorado ao que se dirixe das primeiras idades lectoras.