Conta Anamarciana que cando chega o verán os nenos da Escola Interestelar teñen vacacións. E todas as familias aproveitan para saír de viaxe fóra do planeta Quintoestelar. A súa familia (sen esquecer a vaca Lolaescaiflai e unhas cantas amigas) van ata un dos satélites de Xúpiter, a lúa Europa, porque está sempre cuberto de xeo e ten unha superficie moi plana: é ideal para patinar. Ademais, no seu Mar Interior pódense practicar deportes submariños ou intentar pescar luras. Cerquiña hai tamén moitos lugares interesantes para visitar, como a lúa de Ío, moi quentiña xa que está chea de volcáns e onde se poden facer unhas churrascadas moi saborosas.
O peor é que as vacacións rematan. Hai que volver á Escola. Aínda que tamén é emocionante, pois todos os compañeiros traen moitas cousas novas que contar.