Conxunto de nove poemas protagonizados por animais comúns ao espacio cotián do imaxinario infantil (a pomba, a gaivota, o paxariño, o pardal, o cabalo, a pulga, o rato e o gato ou a bolboreta). A proximidade aos primeiros lectores maniféstase asemade na sinxeleza compositiva, na linguaxe coloquial e no verso breve, desde unha concepción fundamentalmente rítmica.
A sonoridade, a musicalidade en moitas ocasións onomatopeica ou froito da aliteración, constitúe o eixo duns poemas que teñen no xogo verbal propio da oralidade unha das súas principais virtudes.