En sinxelos pareados e presentados cun traballo de ilustración que combina o minimalismo das figuras inxenuistas, ás veces co recurso a referentes fotográficos, cun fondo colorista que crea un ambiente amable, explícanse algunhas características elementais das árbores nunha linguaxe sinxela. Así:
Despois dunha espera impaciente asoma a árbore desde a semente. Medra sen parar co sol e a auga pois teñen que madurar os froitos, pero tamén morre nos incendios de xentes desmemoriadas que non saben que o vexetal dá alegría... Por iso temos que coidalas e respectalas, pois dannos vida coa súa vida.