Todo comezou cando no monte de Setegrixas un lagarto desprezou a escritora en procura de ideas. Alí ocorréuselle pedirlles aos personaxes de Castelao axuda para contar algúns retrincos da vida do rianxeiro ilustre. Non sen rifas entre eles e cos inevitables afáns de protagonismo, participaron nesta orixinal biografía, adobiada con anacos das súas obras e reproduccións de diferentes ilustracións.
Faise deste xeito un percorrido pola vida de Castelao, desde a infancia na vila natal á morte bonaerense e o silenciamento posterior do franquismo.
Entre anécdotas e informacións que contextualizan as xeiras político-culturais deste século, decorre esta obra rigorosa nos datos e amena na concepción divulgadora.