Licenciado en filoloxía galego-portuguesa, está profesionalmente vencellado ao xornalismo e á edición. Redactor na tan interesante como frustrada experiencia do Diario 16 de Galicia, a súa vontade de ser testemuña da realidade, presente tamén na súa creación literaria e na paixón viaxeira, maniféstase en colaboracións en diferentes medios (o semanario A Nosa Terra, o xornal La Voz de Galicia ou a revista Tempos). Desde 1992 traballa en Edicións Xerais de Galicia.
    Autor dunha importante e recoñecida obra narrativa e poética e merecedor de galardóns como o Premio Blanco Amor de Novela Longa, cre que a literatura axuda a comprender mellor o mundo no que vivimos. Fillo inexcusable deste tempo, confesa que lle gusta escribir máis co corazón que coa cabeza e reivindica a capacidade subversiva de toda literatura como posibilidade de lanzar unha ollada interpretativa e crítica sobre a realidade persoal e colectiva.