Segundo aclara o autor na introducción, este traballo formaba parte doutro máis amplo que incluía unha contextualización histórica, publicada, por razóns editoriais, á parte (Os libros infantís galegos). As mesmas razóns editoriais limitaron o número de obras comentables. Procurou, entón, seleccionar as máis representativas tendo en conta o momento da súa aparición, así como os principais autores e tendencias.
Este percorrido crítico por vinteoito libros (en realidade, trinta e un) da nosa literatura comeza en 1968 con "A galiña azul" e remata en 1988 con "Lembranza nova de vellos mesteres". Sitúase cada un no seu contexto histórico, analizando a súa significación dentro da nosa literatura infantil, exponse nun resumo o seu argumento e faise unha aproximación crítica e valorativa salientando os seus aspectos máis relevantes.

121 p. - 19x11 cm.                                                         ISBN    84-453-0049-0