Estudio sobre a poesía infantil-xuvenil galega que se abre cunha panorámica histórica, desde a Idade Media ata a actualidade. Valora a existencia de referencias textuais que teñen como posibles destinatarios tamén os primeiros lectores. O século XX merece unha análise máis pormenorizada. Divídese en tres grandes etapas: de 1900 a 1950, cando aparecen as primeiras manifestacións relevantes; de 1950 a 1980, caracterizado como período de transición e asentamento; de 1980 ao 2000, que se presenta como unha etapa de consolidación.
Agrupados en varios apartados ("Tradición e modernidade", "Renovación pedagóxica e literaria", "As novas editoras e os premios literarios" e "Outros escritores e escritos"), preséntanse os autores cunhas breves notas críticas sobre a súa obra. Aparecen desde os máis prolíficos ou relevantes ata os creadores con un libro de versos.
Unha guía de autores, coas referencias editorias das súas publicacións, e un apéndice bibliográfico pechan este documentado traballo, que enche unha lagoa importante na nosa literatura infantil-xuvenil.

84 p. - 21x13 cm.                                                         ISBN    84-923060-5-X