 |
Subtitulada "Crónica dun agromar
difícil", presenta unha aproximación á historia da
literatura infantil-xuvenil galega dende un enfoque declaradamente persoal,
tamén nas súas valoracións. O autor, un dos escritores de
referencia da nosa literatura, é ademais codirector dunha
colección, crítico circunstancial e estudoso do libro para
lectores novos.
Logo de situar o contexto histórico e a realidade
sociolingüística nos seus condicionantes diglósicos, analiza
a difusión do libro galego desde a problemática do creador e,
sobre todo, dos limitados canles de difusión, tanto no ámbito
familiar como social e industrial.
Estuda a seguir a historia da nosa
literatura infantil-xuvenil en tres grandes etapas: dende 1960 a 1978 (coa
finalización formal da dictadura), entre 1979 e 1988 (período
marcado pola presenza da lingua galega no ensino) e dende 1989 até 1998
(anos de madurez formal, con diversificación de xéneros e
aparición de novos autores e ilustradores, e de consolidación da
súa incidencia social, mesmo exterior, xerando un amplo tecido
asociativo, institucional e industrial en torno ao libro para lectores
xoves).
Pecha o ensaio un anexo sobre os premios da literatura infantil e
xuvenil galega. |
