Catálogo de libros infantís-xuvenís en galego publicados no ano 1996 en primeira edición. Recolle o conxunto da producción literaria dese ano, tanto os textos publicados orixinalmente en galego como as traduccións á nosa lingua, distribuídos en senllos apartados.
Ordenados alfabeticamente por autores, cada libro preséntase cunha ficha bibliográfica, a sinopse argumental e unha recomendación-indicación sobre a idade lectora, na que se diferencian catro categorías (Prelectores e primeiros lectores, Lectores autónomos, Xoves lectores e Xoves adultos). A obra inclúe un apéndice cos índices de autores/as galegos, autores/as traducidos, ilustradores/as, traductores/as, títulos galegos, títulos traducidos, coleccións, editoriais, idades e xéneros.
Esta obra, imprescindible para o coñecemento da evolución da nosa literatura infantil-xuvenil, é froito dun traballo de equipo coordinado por Mª Isabel Soto López. Encargouse da catalogación Pedro Lucas Domínguez, da Biblioteca "Nova 33", e as ilustracións de cuberta son obra de Manuel Uhía.
A edición foi promovida pola Asociación Galega do Libro Infantil e Xuvenil (Gálix), coa colaboración da Dirección Xeral de Promoción Cultural da Consellería de Cultura, Comunicación Social e Turismo da Xunta de Galicia e mais a Biblioteca "Nova 33", dependente da Obra Social de Caixa Galicia.