Catálogo de libros infantís-xuvenís en galego publicados no ano 1994 en primeira edición. Recolle o conxunto da producción literaria dese ano, tanto os textos publicados orixinalmente en galego como as traduccións á nosa lingua, distribuídos en senllos apartados.
Ordenados alfabeticamente por autores, cada libro preséntase cunha ficha bibliográfica, a sinopse argumental e unha recomendación-indicación sobre a idade lectora, na que se diferencian catro categorías (Prelectores e primeiros lectores, Lectores autónomos, Xoves lectores e Xoves adultos). A obra inclúe un apéndice cos índices de autores, ilustradores, traductores, títulos, coleccións, editoriais, idades e xéneros.
Esta obra, imprescindible para o coñecemento da evolución da nosa literatura infantil-xuvenil, é froito dun traballo de equipo coordinado por Blanca-Ana Roig Rechou. Encargouse da catalogación Carme Bar Cendón, da Biblioteca Pública Municipal de Narón, e as ilustracións de cuberta son obra de Xan López Domínguez.
A edición foi promovida pola Asociación Galega do Libro Infantil e Xuvenil (Gálix), coa colaboración da Dirección Xeral de Cultura da Consellería de Cultura da Xunta de Galicia.