Estudio rigoroso con finalidade divulgativa sobre o poeta celanovés. Comeza cunha sucinta "Cronoloxía" de Celso Emilio, á que segue a "Bibliografía" cos seus libros publicados ou inéditos. Continúa cunha reflexión sobre a súa obra, organizada en tres apartados: "Vida e Poesía: O poeta fala dos seus paraísos perdidos", sobre a súa primeira etapa vital, desde os textos; "Longa noite de pedra: Un poeta civil nos tempos de Franco", arredor da súa poética comprometida, e "Un poeta na emigración: Poeta da emigración", buscando explicar e aclarar malentendidos sobre a súa experiencia americana.
En cinco apéndices incorpora materiais anecdóticos ou curiosos. O primeiro, "Aforismo, facecias, epigramas... de Celso Emilio Ferreiro", inclúe a edición facsímilar de 16 pequenos textos manuscritos que tiñan por destino compradores dos seus libros, a modo de dedicatorias que distribuía un libreiro. O Apéndice II aporta dous recortes de prensa sobre a información da súa suposta morte en 1970 e os versos que el escribiu como resposta. Apéndice III: "A morte do poeta: algunhas esquelas". Apéndice IV: "Homenaxe ao poeta": catro elementos informativos de homenaxes con motivo da súa morte. Apéndice V: "Coroa poética para Celso Emilio Ferreiro": sete poemas de diferentes autores, tres deles inéditos e un de Rafael Alberti.
A edición inclúe abundante material gráfico: fotografías e reproduccións de portadas mesmo das edicións semiclandestinas ou que apareceron con heterónimos do autor.

97 p. - 21x15 cm.                                                         ISBN    84-453-0028-8