A feira é unha festa de animación á lectura na que as actividades lúdicas desempeñan un papel fundamental, sen esquecer as actuacións musicais, desde a música tradicional dos grupos de gaitas ao xove rock bravú no Concerto do Libro.

É unha vía de achegamento e expresión dos mozos, que, por outro lado, participan activamente incluso atendendo os stands das editoriais. Pola feira tamén pasaron os Xigantes e Cabezudos ou a Escola de Circo de Bemposta, compartindo todos eles esta mensaxe de relación amigable co mundo dos libros.

As viaxes pola imaxinación

Os espectáculos teatrais acadan unha dimensión participativa imprescindible. A aventura de viaxar polo espello da imaxinación cos propios actores é un reto que os rapaces, convertidos en protagonistas, asumen con entusiasmo. O teatro de rúa ou títeres, o mundo fascinante da maxia e o mimo, convértense nunha compañía excepcional para todos os visitantes. Entón, pais e mestres recuperan sen disimulo a capacidade de asombro e participan do xogo.

Os espacios do xogo

Procurando abrir máis canles participativas que rachen coa pasividade do espectador, organízanse uns obradoiros de manualidades nos que se guían con materiais moi diversos e cotiáns as habilidades dos nenos, desexosos de construír xoguetes elementais. Ademais tamén teñen cabida os xogos populares, que ofrecen a singularidade do recoñecemento na propia cultura e a recuperación dun pasado colectivo esquecido.