Edición excepcional co gallo da exposición A viaxe a Compostela de Cosme III de Médicis. Repróducense diferentes elementos da exposición (retratos dos Médicis, grabados da época, un mapa da península, pezas de cerámica, facsímiles da Compostelana, etc.), como mostra da pluralidade artística que atopou este príncipe florentino na súa viaxe de seis meses pola península, desde o desembarco en Cadaqués deica a chegada a Compostela en 1669, baixando por Andalucía e percorrendo Portugal.
Segundo conta, a modo de guía da exposición e narrador, Rato Ratoni, viaxou cun séquito de trinta acompañantes, entre os que había grandes señores, dous cronistas e un pintor que deixou a testemuña gráfica das súas acuarelas. E non faltou o seu rato de compañía, Renato Ratoni, tataravó do narrador, que deixou no seu diario abondosos datos da aventura, con remate feliz no seu caso, pois en Compostela coñeceu a Rata Linda. E cando ela lle preguntou qué facía polas noites, a súa resposta ("Durmir e calar") abriulle as portas da felicidade. Pasou entón de rato de compañía a rato namorado que ficou para sempre en Compostela.
A impecable edición combina elementos gráficos da exposición co simpático e atractivo traballo da ilustradora.