É esta unha historia dun tempo tan novo que aínda moitas cousas estaban por facer e outras eran tan recentes que non sabían o seu lugar no mundo, como lles ocorría a algúns animais... Un deles, un verme, deu en chorar porque non tiña amigos nin nome por ser tan feo. O moucho aconselloulle que fose onda o Creador e botouse a buscalo.
Bateu no seu andar coa presumida ave do paraíso, a perigosa tarántula, as parvas formigas, o piñeiro contador de estrelas ou Capitán Nemo, o loro orador, o atarefado Castor, o rato cego Fiz, o covarde regato Xan-xan, a avoíña-boa fabricante de soños... ata que chegou onda o Creador, que o castigou por querer agachar a súa fealdade na noite a ter unha luz. Ao que o descubriron os outros animais pareceulles fermosísimo e puxéronlle de nome vagalume.