Cando baixou polo xornal ao quiosco, unha nena atopou na porta da súa casa un pequeno e simpático robot do modelo SF-2: seica estaba perdido e só podía falar cos menores de once anos. Acompañouna e fixéronse amigos, pero como a mai da rapaza non lle quere ese "ferragancho" na casa decide volver onda a súa guapa e intelixentísima Sabela, quen, co seu home Fermín, o construíra. Era unha desas trastadas que o robot facía os domingos pola mañá.
Outro domingo antollóuselle montar no tren, amigando cun rapaz que agardaba na estación para viaxar coa madriña ata Monforte. Ao que o descobren, os adultos, incrédulos, coidan que pode ser unha peza do tren, da calefacción ou así, extraviada. Mesmo o revisor pensa en gunidalo á vía, pero como o prohiben as ordenanzas... A volta faraa no tren que lle diga o rapaz, quen por certo lle pide permiso para contarlle á mestra esta súa aventura.