Conto estructurado en trinta e tres capítulos breves, titulados e numerados, con ilustracións monócromas.
Xenxo, o protagonista, namentres vai de excursión cos seus compañeiros, explica por qué leva á formiga Fara na procura dun novo fogar nunha caixa de pastillas; cómo comezou a criar formigas e a relación que mantivo con elas. Comenta certos aspectos da vida destes insectos -a súa organización social, os seus traballos, a súa reproducción...- e rememora as ledicias e angustias vividas con elas ata o día en que morreron todas, agás Fara, a causa da limpeza feita pola súa nai no seu cuarto.
Ó longo da narración o rapaz fala do tipo de relación que mantén cos seus pais e avós ademais das anécdotas que vive coas súas amizades, Raul Rato, Francisco Malbico, Inés Lameiro, Mira Ponte e co seu mestre don Roberto. De forma simultánea reflexiona verbo das actitudes da xente cando convive preto de persoas doutras culturas, dos diferentes métodos que existen para adoptar un neno e do concepto da morte dende dous puntos de vista diferentes: o da súa avoa, dona dunha funeraria, e o dos familiares dos falecidos.