Unha serie de relatos narrados en terceira persoa e centrados na vida diaria, vainos dando a coñecer a Nerea, unha nena espelida e xenerosa que pasa a vida cos seus pais, co seu irmán pequeno e cos seus amigos. Así transcorren varios episodios caracterizados polo humor e pola inocencia así como polos xogos, as trasnadas e aventuras.
Á parte destas estampas da vida real, na casa, na rúa e na escola, Nerea alcanza, a través dos soños, un mundo fantástico que a conduce a unha lagoa agochada na fraga e habitada por distintos animais cos que acaba por facer amizade. Na lagoa coñece o oso Lambón e axúdalle a atopar a serea Sabela, que estaba en apuros; pero, ademais, esta visita ao mundo dos animais sérvella a Nerea para coñecer o descontento pola deterioración do medio natural que producen os seres humanos.