Comedia nun acto subtitulada "farsada choqueira para actores e bonecos, ou viceversa", que foi representada no ano 1982 polo grupo Antroido. Nela cóntanse as andainas dunha compañía de teatro ambulante formada por Catarina de Siena e Ramiro de Blas que van representando co seu teatriño de bonecos obras para pícaros de pobo en pobo. Chegados a un pobo deciden representar o "Touporroutou da lúa e do sol", peza metateatral pola que van sucedéndose numerosos lances de ton fantástico e simbólico con personaxes xenéricos como o Sol, a Lúa, o Rei dos demos, a Fada, Deus Pai, etc. a través dos que se explican cousas como o nacemento dos días e das noites, os diferentes disfraces do demo, asuntos de tesouros e moitas outras cousas fantásticas.