A nai de Pomba chámase Loli, unha mestra á que lle gustan moito os poetas, especialmente Celso Emilio Ferreiro. O pai, don Antón, é un home de negocios que sempre viaxa en coche.
Papi Antón, como lle chaman nai e filla, está gordo como un pipote, porque come moito e porque non fai caso dos consellos que elas lle dan: ir camiñando a pé desde a casa ata a oficina.
Un domingo don Antón invita á muller e a Pomba a ir a Vilagarcía. Pomba quere ir en tren, pero ao pai non lle gusta a idea. Despois de xantar na vila arousá, deciden regresar á casa, pero a papi Antón non lle acendía o coche. Probou mami Loli, e tampouco. Probou Pomba e agora si que acendeu. Como recompensa os pais levaron a nena ao parque a ver os parrulos, e alí estiveron correndo toda a tarde. Despois viñeron andando ata a casa.
Despois da viaxe, don Antón vendeu o vello "cacharrón", e agora vai andando ata a oficina, come na casa e axuda a facer a comida. Ademais sabe cantar "Son un pasmón peatón con opinión... / Vexo o mundo tal cal é".