Paco Martín deléitanos unha vez máis coa súa fina ironía e ese estilo coidado, sinxelo, con gran riqueza de vocabulario, tan en falta nos libros que ultimamente se publican dedicados ó público infantil e xuvenil sexa en galego ou en castelán.
Partindo dun comezo espléndido onde se relata a espera do nacemento do xove príncipe que trae a alegría a todo o reino, o autor introdúcenos na educación do futuro rei afastado de toda relación coa vida real. O primeiro contacto coa realidade do xa xove rei será duro poñendo en entredito a educación recibida..
Libro que admite diversos niveis de lectura, dende o simple disfrute co argumento ata unha profundización na mensaxe que o autor nos quere transmitir.