Chus Pereiro: Restaurante Farruco
Ilustracións de Xan López Domínguez
Col. Merlín, 191. Edicións Xerais. Vigo, 2009

No Restaurante Farruco entran un home e unha muller para celebrar o aniversario del. Como teñen poucos cartos piden para comer un caramuxo, sen pan nin viño. E tamén vai xantar o Rei. Como é rico, pide auga e un polo, aínda que de momento está no ovo que trae a galiña, que, vista a situación, lisca. Ofrécenlle a cambio churrasco de vaca, que resulta ser dunha vaca mansiña que vén camiñando ata o restaurante, polo que o Rei rexéitaa pois aínda está crúa. Será mellor, logo, que coma tres chocos, pero estes, ante a perspectiva de seren comidos, emborrállanlle a cara con tinta ao monarca. Decide, entón, aceptar a proposta de comer un chourizo, mais cando entra o corricho todo enfadado pola escolla, para calmalo convídao o Rei á súa corte. E como finalmente aparece unha mosca de sopa encabuxada, marchan todos sen comer, pero pagando ben.
Peza de teatro de acto único, escrita en verso divertido e áxil.