 |
"O rei de nada": nunha
vila sen luz nin auga, o alcalde gastou os cartos dos veciños en facer
un castelo. Cansos del, marcharon todos. Nin os paxaros nin o can nin o seu
loro lle facían caso. Era o rei de nada. Puxo logo nas casas luz e auga,
abrindo as billas ata que todo se inundou, e morreu afogado. E os vileses
tornaron ás casas, felices, sen alcalde.
"Rocha e sol": Rocha
vivía nun país no que todo o ano era verán. Co seu pai,
trasladouse a outro no que aínda era inverno e sentiu moito frío.
Á noite, deu durmido coa historia de Caramela, a nena que se volveu de
caramelo. Ao que acordou, Rocha retornou ao seu país. Quitando a roupa
de abrigo polo camiño, chegou onda a mai espida e contenta.
"Ela
era unha princesiña" que se rebelou contra o seu destino e quixo ser
astrónoma. Pero cando tiña idade de casar para seleccionar o
pretendente presentou unha adiviña, que só acertou un home
velliño. Pola lúa, soubo que en realidade era o demo. Ao
descubrilo, liscou e ela nunca casou.
"A cova da serpe": un mouro converteu
a Rosamoura nunha serpe. Levouna canda el e as terras da aldea
tornáronse amarelas e ermas. Outra nena, Mariña, atopou no monte
a semente dunha flor que o mouro lle roubara a unha meiga. Con ela fixo que
Rosamoura recuperase o seu ser e a terra volveu verdegar e dar froitos.
"Anoema", que non podía xogar no xardín porque chovía,
quedouse durmida e soñou que se metían nas súas caixas de
xoguetes a anémona, a pelota, a guitarra e unha araña. Cando
acordou, os xoguetes estaban cada un no seu sitio e as caixas furadas.
"A
bruxa da Maruxa": no país das bruxas, o megáfono, que
dirixía o colexio, botou un día a Antela, a mestra especialista
en técnicas de estudio sen libros de texto. Maruxa conseguiu en
Bruxailandia un xabrón que borrou as follas de todos os textos, polo que
houbo que repoñer a Antela, para alegría de todos os
alumnos. |
