Historia contada en primeira persoa por Tina, quen evoca dende o hospital unha aventura chea de humor. Os relatos de seu pai, escritor, espertan nela a curiosidade e así mesmo amósase intrigada pola escaseza de pesca no río. Por iso decide indagar na busca das causas polas que os peixes desaparecen. Cando xa se atopa na beira do río esvara e a caída condúcea ao mundo dos peixes, onde coñece aos que ata ese momento non eran máis que personaxes das historias contadas por seu pai.
Nun primeiro momento os peixes séntense ameazados pola súa presencia e deciden sometela a un xuízo do que vai saír unha sentencia que a obriga a superar tres probas: convencer á Serea Saudosa de que volva á gran lagoa, contar a historia que lles faga arrincar as escamas aos peixes e aprender a falar o "galego mollado", a lingua dos peixes. Ademais debe cumprilas antes de que apareza a porta dourada, pola cal escapan estes animais.