Recolle as corenta e catro composicións premiadas no certame que convocou a Asociación de Amigos da Poesía Baixo Miño en decembro de 1998. Na presentación que abre o volume, asinada por Emilia Rosende, a presidenta da asociación que convocou o premio, sinálase que a participación foi dun total de 228 alumnos e alumnas de entre nove e catorce anos, pertencentes a once colexios da bisbarra do Baixo Miño.
A seguir recóllense os poemas, que teñen como causa inspiradora o tema do Nadal. Neles aparecen os motivos habituais desta época do ano como a chegada de Papá Noel, as panxoliñas, a ilusión dos regalos dos Reis Magos, sen esquecer o recordo daqueles nenos que non teñen familia, nin amigos, nin fogar para vivir estas festas.