 |
Libro cheo de amigos
divertidos: un pirata escoita o ruído dun rato e teme perder o seu
tesouro, outro busca socios para ir ao rescate do seu, aquel ten unha pata de
nata con chocolate que no verán garda no conxelador... Tamén hai
bruxas: Roberta ten na súa horta mazás coloradas para que durman
cen anos ou máis as princesas namoradas, que segundo o espello non hai
no reino; unha noviña intenta enfeitizar un sapo para resolver os
deberes escolares e outra maior busca unha princesa para enfeitizar, que o
narrador agacha para evitalo. Pero non todas as princesas son iguais: unha
pídelle un príncipe valente aos Reis Magos, pero Adosinda xa
coñece a un, que descobre que os ruídos nocturnos da torre son
cousa do vento; e corren riscos, como a princesa Vero, a quen o mago malvado
lle intenta desfacer o castelo.
E animais varios: a galiña Henriqueta
traslada os seus doce poliños á feira en bicicleta, pois medraron
e xa non pode levalos, como antes, nunha cesta; o señor camaleón,
que é piloto de ascensor, cambiou de cor o día que un home forte
o ameazou con facerlle un nó no rabo se non o daba levado á casa;
un corvo que non acudirá á festa de aniversario da bruxa Roberta
pois recea que ela o enfeitice; o rato que só sae do zapato do rei cando
a ama de chaves lle ofrece unha libra de chocolate e o que lle fai os buratos
no zapato a Antón Melitón.
E moitos dragóns: o que ten
o lume avariado, que só funciona se se enfada, polo que cómpre
pisarlle o rabo para que quede ben ante a dragoa; o que vai á escola de
día e de noite coida o castelo da princesa; outro namorado da bruxa, que
lle pode curar ese resfriado que fai que non ceibe labarada ningunha; o que
toca o trombón e acende as labaradas da festa; e mesmo un
pequeniño, que anda perdido xa que a bruxa do norte borroulle o
camiño, polo que será mellor que marche no autobús das
sete.
E hai versos ledos e ilustracións divertidas, sempre que os
ratiños non coman as páxinas, como lle ocorreu á pantasma
Teresa, que por culpa deles non puido rematar a fermosa historia dun
príncipe e unha princesa. |
