Pedro, un "nubeiro", é o protagonista deste conto dirixido a un lectorado que acaba de iniciarse na lectura. Este neno ten a capacidade de crear nubes ó seu antollo, coas bágoas e o cuspe. No transcurso da obra, Pedro coñecerá a outros nenos e nenas nubeiros coma el, aínda que con diferentes procedementos de crea-las nubes: Anastasia fainas con esconxuros, Roque consegue que medren coa súa especial receita dentro dun bocoi, Ceboleiro constrúeas coas bágoas que verte ó picar cebolas, e así moitos máis rapaces, cada un ó seu xeito. Pedro descobre cómo voar por medio das nubes e atopa entre elas outros personaxes curiosos cos que se relaciona por medio da súa imaxinación.
As aventuras de Pedro poden ser seguidas por medio das ilustracións que acompañan ó relato e que permiten unha lectura visual del.