Nesta obra de título enigmático, relátanse en primeira persoa as aventuras e desventuras que vive co seu pé enxesado, ó que lle pintou os ollos e unha boca e co que fala; fala tamén cos electrodomésticos da casa, que a abandonarán para marcharen de vacacións; coa lúa, á que intentará reter nun baúl para sempre; cun rato que vive na súa cociña e cun amigo inventor que perdeu a memoria.
Ó final do relato, a protagonista deixa a súa casa, que se atopa ateigada de neveiras e ratos, e marcha voando co seu pé de xeso nun cesto amarrado ó corpo do seu amigo o inventor, que se converteu en home-globo.