Edición non venal promovida por dúas consellerías da Xunta de Galicia e mais a Federación de Libreiros de Galicia con motivo do Día Internacional do Libro Infantil e Xuvenil.
Antonio García Teijeiro abre o libro con Bicos, bicos... e máis bicos, conxunto de doce poemas que teñen en común o motivo dos bicos e a eufonía do xogo de palabras cun marcado ritmo musical que os converte en fermosos xoguetes para cantar en verso.
Xoán Babarro González presenta en Sonsonetiño a Pepe Sisto Arou, un trasgo que desde que aprendeu a ler cada día da semana escribe en catorce, un poema de catorce versos que deixa pegado en diferentes sitios. Un día atópase con que non queda ningún humano para lerlle os poemas pois marcharan todos para Canarias. Consegue que regresen á Terra de Soneira viaxando nun bilurico e picando neles como unha pulga. Ata que unha analista lista lles dá a solución: cambiar de clima volvendo á súa terra.
Gloria Sánchez fai un sorprendente exercicio de creatividade coas Palabras, relacionando o xogo tipográfico do significante que permite a sorprendente pluralidade de fontes con rápidas e ricas suxestións poéticas.
Por último, María Dolores Ruiz relata en Lucas, o vampiro do leite o cambio que se produce na vida de Petunia coa intromisión na harmonía familiar que supón o nacemento dun irmán, Lucas. A rapaza pasa de sentir tenrura polo bebé a sufrir o desexo de impoñerse deste. Cando ela está na cama, soña que a ameaza e expulsa do seu cuarto: os pais atópana durmindo no corredor. Porque, aínda que parece boíño, ela sabe quen é en realidade: ¡Un vampiro de leite!