Volume composto por tres contos:
"O mundo de Xoana", no que se conta a historia dunha nena minusválida, que crea o seu mundo a través da imaxinación. Chega así a figurarse que ao lado da súa casa vive Xacobe, un personaxe inventado por ela, pero que se converterá en realidade cando o coñece por medio dunha das súas pombas mensaxeiras.
En "Antón e a paxariña de papel", un neno solitario ao que lle gusta pasear o seu can e falar co seu avó, atopa unha nena, Sariña, que comprende o seu afastamento.
No derradeiro dos contos, "O monicreque de Alicia", a protagonista sae da súa tristura gracias á compaña de Serafín, un monicreque que lle regala o seu amigo Alexandre.
Os tres protagonistas caracterízanse por vivir en soidade e por aprender o valor da amizade a través das experiencias que se desenvolven en cada unha das narracións.
Acompañan ao volume unha serie de preguntas didácticas sobre o contido dos contos, elaboradas por Xavier Frías para o traballo do público lector.