Libro que inclúe poemas das dúas irmás autoras, diferenciados en dúas partes. Na primeira, recóllense os poemas de Pura Vázquez. Neles, preséntanse con verso áxil e rítmico o mundo da natureza próxima (habitada por animais familiares como os vagalumes, as vacas, as formigas, os grilos, os lobos...) ademais da relevancia simbólica da lúa e as estrelas; o Neno Xesús reaparece con tenrura e adoración en poemas de Nadal ou panxoliñas; o anano e personaxes dos contos clásicos habitan en versos amables; e o momento do sono, que ás veces se resiste, convive coa tranquila escuridade, compañeira dos soños e do descanso do neno, nunha visión maternal inzada de doce lirismo.
Na segunda parte, os poemas de Dora Vázquez comparten o interese polo espazo natural habitado por animais cómplices, a amizade con personaxes do mundo literario infantil como Caperuciña, Cincenta ou Pulgarciño, e a relixiosidade coa Virxe e Neno Xesús, pero cun certo toque de audacia formal en poemas como a muiñeira do Nadal. Así, non falta a intención lúdica en cancións de rolda para acompañar los juegos e aparece o mar en forma de vocación mariñeira disposta mesmo a vivir aventuras da piratería.