Contos breves que teñen como protagonistas os membros da tribo africana dos Mangala. Cada tarde, coa posta do sol, algúns contacontos deleitan os 628 habitantes da aldea con relatos curiosos. Nesta ocasión, o contacontos Bla-Bla-Blá narra catro historias relacionadas entre si.
Comeza coa narración do rei gordo, que manda a súa xente na busca dun cabalo branco. Por fin, e despois de vencer a un anano con bigotes, conseguen o seu obxectivo. A continuación, narra a historia do rapaz que embotellou á morte para evitar que levase a alma da súa nai. O terceiro conto trata das aventuras de tres moniños -Paulo, Lois e Alfonso-, que emprenden o camiño na busca dos seus destinos. Para rematar, Bla-Bla-Blá relata cómo se crearon algúns animais. No epílogo, afírmase que, cando cae a noite, os habitantes da aldea Mangala dormen e soñan coas historias que acaban de escoitar.