A busca da chave perdida que abre unha caixa de música serve de escusa argumental para que os dous nenos protagonistas do conto, Bea e Manolo, nos presenten os animais que frecuentan ou viven nun parque urbano: un cachorro de pastor alemán, unha toupa, unhas pombas, os peixes vermellos do estanque...
Entre todos, e ante o asombro dos dous nenos, son quen de facer posible que o que en principio semellaba labor máis difícil có de atopar unha agulla nun palleiro, chegue a converterse nunha verdadeira experiencia de colaboración e convivencia na que ninguén é alleo ós problemas que afectan ós demais sempre qiue exista algo esencial para toda relación: a comunicación.