No derradeiro ano do século, ocorreron dúas cousas extraordinarias na cidade de Viladeteixo: o Papá Noel retrasouse por culpa dun grande atasco nas montañas, chegando a véspera de Reis, e tanto a el como aos Reis Magos de Oriente roubáronlles os xoguetes que viñan repartir.
A principal sospeitosa era Rosana Patacatola, unha anciá que seica xa pasou dos cen anos, tan marchosa que mesmo pon medallóns hippies ou tinxe o pelo de azul ou verde. Contan que vive do aire e que é contrabandista de paxaros, porque os recolle da cidade e libéraos da contaminación levándoos ao campo, e de animais de compañía en cativerio. Pasa o día regalando ovos polos barrios pobres da cidade. Un destes anos deulle por frecuentar o barrio de Kalpankalá, o máis miserento de Viladeteixo, que ten chabolas en vez de casas e as rúas sen luz. Aprendeu a ler aos nenos do barrio cambiándolles caramelos por letras. Pero presentóuselle un problema: os rapaces pediron xoguetes por Reis. Entón ela, con dous amigos, argallou un misterioso plan de recollida de xoguetes sen estrear.
O caso é que, ao rematar a cabalgata, os Reis Magos de Oriente déronse conta de que lles roubaran todos os xoguetes. Foron denunciar o caso a comisaría. O policía pensou que puidera ser Rosana Patacatola. Mais quen a había atopar en Viladeteixo, que ten varios millóns de habitantes...?
Esa noite, ela e mais os dous amigos repartiron xoguetes entre os nenos que nunca tiveran xoguetes. Aínda que o problema foi que cando se lles acabaron as pilas non tiveron cartos para comprar máis. Como se pode apreciar nas abundantes e cálidas ilustracións que iluminan o texto.