Andrés Rei López, Andi, de once anos, causa a risa dos compañeiros porque é moi torpe nos aparellos de ximnasia. Pero, sobre todo en natación, desde que con seis anos viu afogar no mar unha amiga. E isto é o máis preocupante, pois pode privar á súa aula de gañar a competición do centro que ten como premio un aprobado xeral e mais unha viaxe ás Canarias. Por iso terán que se aplicar o compañeiro Pablo Vieira e a avoa Elisa. O primeiro axúdalle a aumentar a forza muscular; a segunda, nun arranque de determinación, consegue que aprenda a nadar.
Deste xeito, aporta os puntos decisivos no concurso para o seu grupo. E anímase a adestrar na piscina, polo que o ano seguinte xa empeza a destacar co seu amigo a nivel galego. Aínda que Pablo, canso de nadar tantas horas, e logo de acadar a medalla de ouro no campionato de España de Promesas, non quere facelo máis intensamente para entrar no equipo estatal de natación e marchar para Barcelona. Andi, si. Mais ten un problema: debe aprobar todo 8º. Coa axuda dos compañeiros, é quen de sacar os aprobados.
A súa consagración chega coa invitación a competir en Alemaña, no Trofeo Internacional da Amizade. Nunha carreira emocionantísima, televisada, ¡gaña sorprendendo a todos! A avoa Elisa, feliz, que sempre estivo ao seu lado, sabe por qué: porque un campión non nace, faise traballando.