Breve comedia nun acto, con dezaseis personaxes e unha sinxela posta en escena. A historia mestura personaxes e o fío argumental do popular conto de Brancaneves e da materia de Bretaña, o Rei Artur, a Demanda do Santo Graal e os cabaleiros da Táboa Redonda.
A raíña, confabulada coa bruxa Morgana, asasinou ao Rei, converteu ao príncipe Artur nun zapateiro remendón e destituíu do Consello Real de Menciñeiros á meiga Traamunda e ao Mago Merlín. Cando a raíña é advertida polo seu espello de que xa non é a muller máis fermosa de Ofiusa, víngase en Brancaneves. Os ananos axudados pola meiga Traamunda e polo príncipe vencen á Raíña e restitúen no trono ao rei Artur. Ao final a Raíña e a meiga Traamunda morren, Brancaneves resucita e namórase de Artur. Merlín é restituído no seu cargo de presidente do Consello de Menciñeiros, Morgana foxe e o rei Artur segue cos Cabaleiros da Táboa Redonda na procura do Santo Graal. O libro conta cun epílogo no que o autor dá algunhas indicacións para facilitar a posta en escena.