No século XVII, o pirata inglés Schiller abordou un barco italiano que levaba valiosos gravados para un califa. Encargado o aventureiro florentino Boticheli de recuperalos, vai a Túnez, onde tiña o seu refuxio o corsario.
Alí por un ancián sabe dunha buguina que á noite deixa oír as conversas que escoitou polo día. Roubáralla Schiller. Consegue recuperala e gracias a ela localiza o comerciante que lle comprara os gravados ao pirata. Faise con eles e foxe nunha caravana polo deserto conseguindo eludir un asalto dos imohags. En Marsella, un pousadeiro intenta enredalo para roubarlle, pero enteirado pola buguina, lisca. En Xénova logra saír da cidade simulando unha procesión. Préndeno logo, pero libérano uns serventes da familia Doria disfrazados de soldados e chega por fin, pasados meses do comezo da aventura, a Florencia, entregando os gravados ao seu dono, un rico comerciante.
No epílogo informásenos de que Boticheli tirou a buguina ao mar para evitar que caese en malas mans. Algún día se cadra volve aparecer nas redes de calquera embarcación das nosas rías.