Peza de teatro de ambiente "real". El-Rei Mandamais (que só proba perdiz desde que un día foi feliz ao comela) xogoulle a El-Rei Tatexo a man da súa filla Tanxerina contra o reino deste (un simple testo con catro flores mal feitas). Trátase de dicir ben un trabalinguas pero el ten impo e non lle dá pasado e o seu rival consegue non tatexar cando toma xarope de cotorra. É certamente un caso complicado. Pero os fillos, o miope e desmemoriado Pergamiño, e Tanxerina, conseguen desfacer a aposta con algunha que outra trampa.
Se a estes personaxes engadimos a presencia de Miss Butterfly (fada que cun flis aparece sempre ao momento disposta a solucionar males de amores) e o cabalo Foguete, que parece ter sentido común, temos un enredo divertido e de áxil representación.