Obra escrita en 1992 e estreada polo grupo TEINA no ano 1993 na Mostra de Teatro Infantil "Xeración Nós". Dividida en dous actos con oito e tres escenas respectivamente, relata o acontecido tras ser convocado o V Certame Internacional de Autómatas Cándido Requena, no que os dous concursantes históricos, o doutor Triquiñuelas e o doutor Atila, se ven sorprendidos pola presencia dun novo concursante, Torcuato Berenxena, que manda ao concurso unha misteriosa caixa con ordes de non abrila nin tocala. O desexo de averiguar o que hai na caixa é tal que subornan ao vixiante da sala de exposicións onde están as obras do concurso coa finalidade de estragar os autómatas do resto dos competidores e averiguar qué hai na caixa. A pesar de todas as artimañas non conseguiron saber o segredo ata o último minuto do certame.
Ao final do libro aparecen unha serie de suxestións e indicacións escenográficas, de atrezzo, mobiliario, vestiario e posta en escena.