Don Matías, o ancián navegante frustrado, atopa un día a catro rapaces mirando o escaparate da súa tenda de animais. Desde aquela van compartir moitas horas no ruidoso e variopinto negocio. Os catro amigos, Calo, Tino, Turbo e Manuelo prefiren enredar co vello en vez de aturar os profesores. Por iso el mesmo os deixa ao cargo do establecemento para atender os clientes, aínda que ás veces non procedan profesionalmente, asustando a unha muller convertendo a Calo nun cadelo enrabexado o recomendándolle a outro que lle toque a harmónica ao xílgaro para que cante mellor. Non poden estar sen facer das súas, levando un mono da tenda para xogar a Tarzán ou o gato Micho, que pechan nun saco e botan á auga, facendo carreiras con el atado. Mesmo son capaces de meter un gato nun garrafón, que inevitablemente rompe armándose un bo batifondio.
Pero o susto máis grande lévano eles cando don Matías bota días sen abrir a tenda. Afortunadamente, só se trata dun malestar pasaxeiro producido polo chocolate que compartiu cos rapaces, que non lle senta ben. Perdóalles as súas falcatruadas. Porque entre os cinco conservan un tesouro que se chama amizade.