Ana e Luís viven nunha vila a carón do río e xúntanse todas as tardes para xogar nunha carballeira inmensa. Un día, uns homes vestidos de gris puxéronse a medir o terreo, porque a propietaria, dona Rosa, vendérao por moitos cartos para que fixesen alí centos de casas. Reunidos ao redor do Gran Carballo os rapaces non saben que facer. Mais os seres máxicos do bosque escoitáronos. E en sucesivas noites foron un trasno, dúas fadas verdes, unha bruxa e unha moura dicirlle a dona Rosa que non tiñan onde ir se desfacían a carballeira, pois xa tiveran que deixar os bosques e os ríos onde vivían por culpa da contaminación. Uns días despois, xa desapareceran as máquinas. Dona Rosa volvérase atrás na venda. Á tarde seguinte os nenos fixeron unha festa ao pé do Gran Carballo. Os seres máxicos, agachados entres as pólas, tamén se sentían felices. E seguirían a protexer a vida nos bosques e nas augas como veñen facendo desde os comezos dos tempos.
A edición, ilustrada a cores, incorpora unha reflexión didáctica de Teresa Soler Cobo sobre a necesidade de protexer a natureza e conservar a auga limpa, dosificando o seu consumo, para que a vida no planeta continúe.