 |
Moitomellor é
unha vila diferente, e o seu carteiro un personaxe peculiar. Como facía
a súa avoa, que abría e lía as cartas para logo contarlles
o contido aos destinatarios, que non sabían ler, o carteiro
Fideliño curiosea nas cartas, que logo pecha con moito tino. Por elas,
sabemos das tarxetas en inglés que lle manda Carlota desde Manhattan ao
alcalde, do misterioso paquete que recibe do Xapón o tendeiro
Hermenexildo ou do enigmático namorado de Anuska, que cada xoves lle
envía unha carta de amor...
En forma de áxiles diálogos
e con notas humorísticas, van desfilando os personaxes, nunha boa
relación comunicativa e cos seus enredos: o mestre Moisés ten
unha sustituta que fai sentir nostalxia de súa bondadosa
sabedoría; Anuska intenta por diversos medios descubrir o seu namorado
anónimo; Hermenexildo recibiu do Xapón uns misteriosos
Mormofoniños, uns bechos electrónicos que collen diversas formas
mesmo de globos flotantes, pero non llos quere ensinar aos veciños
aínda; o amor do carteiro, Benny, anda sempre en moto e con minisaia moi
curta e é tan especial porque aterrou doutra galaxia en Galicia, onde se
sente moi ben; o can do carteiro, Cancudrulo, é un fillo de lobo que non
sabe ladrar ben...
Esta galería de personaxes no seu curioso
territorio, péchase cunha ampla proposta de actividades
didácticas, habitual na colección, da autoría de Mª
Xesús Lama. |
