En Castrelo de Faro, pequena vila costeira, vive a viúva Ramona unha vida tranquila. Ata o misterioso caso das galiñas.
Unha mañá faltáronlle as dezaoito galiñas. O Raposo Lambón, que levaba unha semana sen comer pois noutros dous galiñeiros tampouco atopara nada, ofreceuse a axudala na investigación. Acudiron a un detective, pero de pouco lles valeu: xa os informaría cando deducise algo. Un folleto de turismo caído no galiñeiro co carimbo da axencia de viaxes de Eudivixe conduciunos ao home desta, Camilo, repulsivo, xogantín e explotador da muller. Seguiuno o Raposo ata a antiga fábrica de cerámicas abandonada, onde uns homes metían en camións a centos de galiñas para levalas de vacacións ao "Centro de Actividades Recreativas Solmarepraia". Tentando achegarse a eles, o Raposo acabou caendo... e un pao na cabeza deixouno sen sentido.
Informada Ramona polo diario local de que prenderan o Raposo como autor dos recentes roubos de galiñas, puxo o vestido malva que tanto a favorecía e conseguiu que o sarxento Constante, admirador seu, aceptase deixalo ceibo 24 horas para que demostrase a súa inocencia. Co Raposo disfrazado con gabardina e sombreiro para non ser recoñecido, un taxi levounos a unhas misteriosas naves, onde milleiros de galiñas en butacas están apampanadas ver a tele. Ramona reclamou as súas, pero o lobo presidente da empresa contestoulle que todas estaban alí de vacacións por vontade propia. Poñen tres ovos diarios, entretidas vendo os programas de tele-lixo en cómodas butacas-poñedoiros, sen se moveren en todo o día para aforrar enerxía e comida. Aprovéitanlles todo: cando van vellas fan delas croquetas de lagosta ou salchichas de tenreira, comida para cans e ata caramelos verdes. Cando seica van facer croquetas con eles os dous e unha esteira coa pel do raposo, irrompen policías ao mando do sarxento Constante, que os rescatan das gadoupas da organización do criminalísimo internacional conde de Malasherbas.
De volta no autobús, as galiñas cóntanlle a Ramona que un día chegáralles un folleto ao curral ofrecéndolles vacacións gratis e non resistiron a tentación. Daquela, para que o sempre famento Raposo non teña que andar comendo nas galiñas, Ramona ofrécese a darlle de cear todos os días. É o comezo dunha boa amizade.