O rei león vive entobado nun cubil cheo de desperdicios e porquería. Ademais, desde que unha manada de elefantes andou a retumbar polo chan da selva, unha invasión de ratos foise agachar na súa gorida. Para liberalo dos roedores nomean Garda Real a Hamelón, un gato que vive feliza coa súa dona Melisa e os seus fillos.
Con este novo oficio, Hamelón non terá problemas para abastecer de ratos a toda a súa familia. Pero os malos conselleiros do rei pretenderán tenderlle unha trampa para que o propio león o chegue a comer.
Todo este infortunio será solucionado cando Robus, con tódolos seus seguidores, logra expulsar da selva a toda esa camada de farsantes que rodeaban ao vello león. O antigo rei vive agora cos humanos, preso nunha gaiola onde nin sequera ten azos para zorregar golpes coas poutas.