Reúne nove contos nos que predominan os elementos tomados do mundo da natureza co propósito de insistir na importancia de coñecer e preservar o medio. No prólogo preséntanse os textos como un feixe de soños cos que partir "na procura do vento verde, ese vento de liberdade que nos vai levar seguro cara ao futuro común de paz e vida, de ecoloxía e solidariedade".
Os personaxes viven experiencias fantásticas a través de soños que lles serven de aprendizaxe para coñecer o seu contorno e aprender a respectalo. O narrador dirixe en todos eles unhas palabras finais aos seus lectores que funcionan como sentencia conclusiva. Insístese así na importancia de defender o medio coidando os ríos e o mar -en "Landras", "A fervenza", "A Illa Bolboreta" e "A ría"-; respectando as árbores, as flores e os paxaros -en "As palabras perdidas", "Camiñando polas letras" e "Bos días"-; practicando a reciclaxe -en "Reciclín"- ou observando os fenómenos da natureza -en "Róubanno-lo ceo".