Consta este volume en total de seis contos. Dous xa publicados con anterioridade: Cascabel, o cabaliño do circo (1971) e Estreliña do Mar (1969) que presentan correccións lingüísticas en relación coas primeiras edicións; Piñóns de ouro, traducción de "Torbi, el leñador", obra coa que Dora Vázquez merecera unha mención no concurso de contos "Jauja" de Valladolid e publicada no xornal "Libertad" de Valladolid o 28 de setembro dese mesmo ano, 1960. Trátase dun conto montado sobre un soño do protagonista o día que ao cumprir os 14 anos o seu pai o mandou ao monte para seguir o oficio familiar sen poder atender o afán do fillo por estudiar unha carreira. No soño o fillo consegue estudiar pero ten que volver por non saber facer o esforzo preciso para conseguir o que un quere e non tirar cos cartos. Finalmente, o volume péchase con tres inéditos: A correr mundo, A roseira de Mariquiña e O neno e o paxaro, nos que se desenvolven temáticas moi próximas ao mundo infantil, protagonizados por animais e nos que se pon de manifesto a importancia da bondade, a comprensión, a xenerosidade, a experiencia, a formación, etc.