O autor preséntanos estes cinco contos máxicos coma a maneira de facer real os productos da imaxinación.
En Serapio, vendedor de estrelas, unha nena cóntanos en primeira persoa o seu encontro con Serapio, o home que vende todo tipo de cousas marabillosas, e cambia estrelas por soños.
Viaxe ó cero, é o relato da excursión que Mirian e o seu gato Miguel fan ó introducirse nun cero que hai pintado na parede. ¿Que haberá dentro da nada?
De novo, un rapaz narrador vainos poñendo ao tanto do que está a pasar na súa casa ante a sorpresa dos pais: todo o que el soña pola noite aparece ao día seguinte no seu cuarto. Volverán as augas á súa canle cando poida levar as cores, a luz e os sons a Un estraño bosque gris.
Unha bolboreta chamada... vai repartindo Felicidade ó seu paso. Todos queren saber o seu nome, sen darse conta de que está aí.
A dirección do nariz todos a saben, pois nela vai pasiño a pasiño o zapateiro de Outeiro de Eiravedra, aventura tras aventura ata espertar no mellor dun soño.