 |
Nesta edición
institucional con motivo da VII Campaña de Fomento da Lectura
recóllense catro contos orixinais de recoñecidos autores galegos
de literatura infantil-xuvenil:
Carlos Casares abre o libro con
"Lolo aprende a andar en bicicleta", onde relata o que lle ocorreu a un rapaz
de cinco anos, Lolo, quen, por unha pequena trastada co almorzo, non puido
recibir de agasallo de Reis unha bicicleta. Era a súa ilusión.
Sabedor de que seu pai era moi torpe andando en bicicleta, el quería
unha para facer chulerías pola rúa. Practicou en segredo na do
pai, primeiro no garaxe e logo no valado de tixolo, ata converterse nun
equilibrista en dúas rodas. Cando o descubriron, castigárono.
Pero, co asombro paterno pola súa habilidade, logo de preparar un
domingo un bo almorzo familiar, aquel ano os Reis botáronlle a arelada
bicicleta. Este conto, nunha versión algo máis reducida,
publicouse posteriormente co título de Lolo
anda en bicicleta.
Úrsula Heinze en "O monstruo" conta o
que lles ocorreu a cinco amigos nas vacacións de verán, cando,
estando na praia, se lles apareceu un dragón enorme do que viñan
escapando uns homes nunha lancha. Quixéronos axudar, intentando matar o
monstro cunha escopeta, pero axiña os homes descubriron a súa
má intención: eran secuestradores de nenos. Afortunadamente, a
oportuna intervención da policía chafoulles o negocio aos
perigosos bandidos.
Xoán Babarro González en "O
vioclín da princesa Bratarina" conta que nos anos de
"adiviñaticando" no reino de Taramunde naceu a princesa Bratarina, moi
afeccionada á música, que cando ía cumprir os dez anos
pediu de regalo un "vioclín dos Rollin Troques". Pero ninguén
coñecía no reino tal invento. Todos se puxeron a buscalo
(confundíndose no nome, que acabaron transformando nun auténtico
trabalinguas), deixando as casas abandonadas e os reis e a princesa sós
e tristes. Por iso, unha noite convertéronse en "esquíos no
xardín / ata que regresen con vioclín", que só se
desencantarán cando alguén lles leve o vioclín ou
vioclán... Este relato figura, ampliado, nunha edición posterior
no libro A princesa do cabaliño
café.
Magdalena de Rojas Silva e Carmela Otero
Vilas narran en "O galiñeiro de don Ramón" a sorpresa do galo
Pavarotas e a galiña Cocolista ao descubriren un estraño
animaliño no galiñeiro, que de repente empezou a pitar,
asustándoos a todos. Aclarouse todo cando apareceu a señora
Ramona, que se decatou de que era o reloxo perdido do señor
Ramón. |
