Nesta edición institucional con motivo da VIII Campaña de Fomento da Lectura recóllense contos orixinais de catro recoñecidos autores galegos de literatura infantil-xuvenil:
Antonio García Teijeiro abre o libro con "O monicreque de Alicia", unha rapaza discriminada polas amigas por ser un chisco coxa dunha perna, a quen un compañeiro do colexio lle regala un novo amigo, o monicreque Serafín. Con el coñece a felicidade no fantástico Reino das Camelias.
Bernardino Graña en "Os monos contra os paxaros" conta de cando a nación dos monos, guiada por un xefe soberbio, escoitou os consellos do Espírito do Mal disfrazado de pavón e acabou en guerra contra os paxaros, que non lle fixeran caso a este e preparáranse para o inverno facendo niños abrigados.
Marilar Aleixandre en "Neve na Amaía" narra que hai moitísimos anos veu a neve e un frío moi grande á Amaía, onde a avoa de Berta, como tiña que ir á feira, lle encargou á rapaza que non deixase morrer o lume. Pero, mentres atendía outras tarefas, apagoúselle. Un veciño, a cambio de tizóns para recuperalo, pediulle uns groliños da auga que canta; a fonte daralla se lle trae terra que soña; a cambio desta, a pedra fita do castro pediulle un sopro de vento que pinta; este conformouse con que lle mandase un bico voando desde a palma da man. Entón, puido levarlles a todos o que querían e recuperar o lume. O grilo, que lle axudara sen esixirlle nada a cambio, só lle pediu que o admitise na súa casa, a carón do lume... Este conto figura nunha edición posterior no libro O trasno de Alqueidón.
"Flor da Mañá", de Palmira G. Boullosa, relata a historia do Príncipe Carballo, que saíu do sétimo bosque á busca de esposa e as sete fermosas fadas que coidan flores nos sete xardíns aconselláronlle que buscase no mar. Namourouse da Raíña dos Mares, quen casou con el coa condición de, no caso de teren unha filla, se cando cumpise os quince anos non casaba cun príncipe que atinase as sete adiviñas que a princesa lle debía propoñer, a moza iría para o mar, onda a mai. Axudada polas fadas das flores, a princesa propúxolle as adiviñas ao Príncipe Primavera, que as acertou e puideron casar.