Chinto e Tom herdaron unha cama antiga e unha toxeira nun fermoso outeiro. É bo lugar para vivir, pensan, e erguen unha casa. Por non medir antes, sáelles pequena de máis e ao intentar meter a cama, rómpena. Axiña se lles ocorre a solución: construír a vivenda a medida da cama.
Confiados na súa experiencia, abren un obradoiro de carpintería. Logo aparece o primeiro encargo: un armario enorme, que lles sae desmesurado e non poden sacar da casa. Por iso cando chega a clienta, que resulta ser unha xiganta que non cabe pola porta, mándana sentar e fan sobre ela outra casa a medida. O problema é se decide erguerse e quere saír fóra dar un paseo.